Ripot soim olsem PNG lusim moni long logging tax

October 9, 2018
Source
ABC News - Australia

Hilda Wayne

Wanpla wokpainimaut blong Oakland Institute blong America isoim olsem ol logging kampani long Papua New Guinea iwok long mekim planti moa moni long ol timba blong kantri tasol ol ino save peim gut tax o takis moni blong ol long gavman.

Long 2016, Oakland Insitute ibin painimaut olsem PNG gavman ino kisim tax moni mak long planti million kina long wanem ol kampani isave giamanim gavman long ol ripot blong ol na abrus long peim tax blong ol.

Man husat igo pas long mekim displa wok painimaut, Frederic Mousseau itokim Richard Ewart blong Radio Australia Pacific Beat program olsem, bikpela foran logging kampani Rimbunan Hijau em wanpla long dispela kampani.

Mr Mousseau itok PNG i nau kamap olsem nambawan expota blong tripokol timba long world, na logging i bagarapim ol bikbus we 80 percent pipol long kantri i dipend longen.

Em itok planti long ol dispela illegal logging oli karim aut long ol Special Agrikalsa Business Leases (SABL) graun we wanpela inquari i painimaut pinis olsem em i illegal - na oli mas rausim.

Tasol Mr Mouseau i tok gavman i mauswara nating.

Wanpla PNG activitist husat isave toktok strong egensim korapsin, Martyn Namorong itok PNG imas stopim displa pasin blong ol logging kampani i stilim moni blong kantri na ol landowners.

Mr Namorong itok ol timber diwai blong PNG iwok long lus nating long ol illegal logging wok, na em i askim olgeta lida long wokbung long stopim dispela pasin - na larim ol pipol i benefit moa long timber blong ol.