Skip to main content Skip to footer

OI ថា WB បំផ្លាញ​ជីវភាព​ប្រជាជន

October 21, 2014
Source
The Phnom Penh Post

ភ្នំពេញៈ ខណៈ​ធនាគារ​ពិភពលោក (WB) ពិចារណា​ផ្តល់​កម្ចី​ថ្មី​ឲ្យ​កម្ពុជា របាយ​ការណ៍​ចេញ​ដោយ​វិទ្យាស្ថាន Oakland Institute ដែល​ជា​វិទ្យាស្ថាន​របស់​ក្រុម​អ្នក​វិភាគ​គោល​នយោបាយ បាន​ចង្អុល​បង្ហាញ​ថា គោល​នយោបាយ​របស់​ធនាគារ​នេះ បាន​បំផ្លាញ​ជីវភាព​របស់​ប្រជាជន​កម្ពុជា ជា​ជាង​ការ​កាត់​បន្ថយ​ភាព​ក្រីក្រ។

លោក Anuradha Mittal នាយក​ផ្នែក​គោល​នយោបាយ​នៅ​វិទ្យាស្ថាន Oakland Institute បាន​ថ្លែង​ថា៖ «ធនាគារ​ពិភពលោក ធ្វើ​តាម​គំនិត​សាមញ្ញ​មួយ​ដែល​ថា ការ​វិនិយោគ​ឯកជន​នឹង​នាំ​ឲ្យ​មាន​កំណើន​សេដ្ឋកិច្ច​និង​នាំ​ឲ្យ​មាន​ការ​អភិវឌ្ឍ ខណៈ​មិន​អើពើ​ពី​អ្វី​ដែល​កំពុង​កើត​ឡើង​នៅ​មូលដ្ឋាន​ជាក់​ស្តែង​ទៅ​លើ​ប្រជាជន​កម្ពុជា​រាប់​រយ​ពាន់​នាក់​និង​រាប់​លាន​នាក់​នៅ​លើ​ពិភពលោក ដែល​ជា​អ្នក​ចាញ់​ទាំង​ស្រុង​នៅ​ក្នុង​ល្បែង​នេះ»។

តាម​រយៈ​ការ​ដាក់​ចំណាត់​ថ្នាក់​ពិភពលោក​ដូច​ជា «របាយ​ការណ៍​ការ​ធ្វើ​ធុរកិច្ច» ប្រចាំ​ឆ្នាំ​របស់​ខ្លួន ធនាគារ​នេះ​បាន​ផ្តល់​នូវ​ពិន្ទុ​ខ្ពស់​ជាង​មុន​ឲ្យ​ប្រទេស​មួយ​ចំនួន​ដែល​មាន​ស្តង់ដារ​សង្គម និង​បរិស្ថាន​ទាប​បំផុត​ពាក់​ព័ន្ធ​នឹង​ធុរកិច្ច។ របាយ​ការណ៍​នេះ បន្ត​ថា៖ «អំណាច​ហិរញ្ញ​វត្ថុ​និង​អានុភាព​នយោបាយ​របស់​ធនាគារ​នេះ បាន​ធ្វើ​ឲ្យ​វា​លំបាក​សម្រាប់​ប្រទេស​ក្រីក្រ​គ្មាន​ហិរញ្ញ​វត្ថុ​ក្នុង​ការ​ប្រឆាំង​នឹង​ស្ថាប័ន​នេះ»។

កាល​ពីបី​ឆ្នាំ​កន្លង​ទៅ​មន្រ្តី​អធិការ​កិច្ច​ផ្ទាល់​របស់​ធនាគារ​ពិភពលោក បាន​រក​ឃើញ​ថា ធនាគារ​នេះ​បាន​សម​គំនិត​នៅ​ក្នុង​ករណី​មួយ ក្នុង​ចំណោម​ករណី​បណ្តេញ​ចេញ​ពី​ដី​ធ្លី​ក្នុង ប្រទេស​កម្ពុជា គឺ​ប្រជាជន​ជាង ២ ម៉ឺន​នាក់ ត្រូវ​បាន​បណ្តេញ​ចេញ​ពី​ផ្ទះ​របស់​ខ្លួន​នៅ​តំបន់​បឹងកក់ នៅ​ពេល​ដែល​កម្មវិធី​មួយ​ដែល​គាំទ្រ​ដោយ​ធនាគារ​នេះ​បាន​បដិសេធ​មិន​ផ្តល់​ប័ណ្ណ​កម្មសិទ្ធិ​ដី​ធ្លី​ទៅ​ដល់​គ្រួសារ​ទាំង​នោះ ហើយ​ផ្ទុយ​ទៅ​វិញ​ផ្តល់​ឲ្យ​ក្រុម​ហ៊ុន​អភិវឌ្ឍន៍​នូវ​ការ​ជួល​ដី ៩៩ ឆ្នាំ។ ក្នុង ប្រទេស​កម្ពុជា រលក​នៃ​កំណែ​ទម្រង់​បដិប្បញ្ញត្តិ​ដែល​ចាប់​ផ្តើម​ក្នុង ឆ្នាំ​២០០៣ បង្កើត​ឲ្យ​មាន​ការ​វិនិយោគ​បរទេស​កើន​ឡើង ប៉ុន្តែ​ជាមួយ​នឹង​ដី​កម្ពុជា​ជាង ២,២ លាន​ហិកតា​ត្រូវ​បាន​បែង​ចែក​ឲ្យ​ក្រុម​ហ៊ុន​ធំៗ កំណើន​ការ​វិនិយោគ​បរទេស​បាន​ធ្វើ​ឲ្យ​មាន​ជម្លោះ​ដី​ធ្លី​កាន់​តែ​ច្រើន។ ចន្លោះ ឆ្នាំ​២០០០ និង ២០១៤ ប្រជាជន​កម្ពុជា​ជាង​កន្លះ​លាន​នាក់​បាន​ទទួល​រង​ការ​បណ្តេញ​ចេញ​ពី​ដីធ្លី។

របាយ​ការណ៍​ការ​ប្រចាំ​ឆ្នាំ​នេះ​បន្ត​ថា៖ «តាម​រយៈ​ការ​ជំរុញ និង​លើក​ទឹក​ចិត្ត​ប្រទេស​ទាំង​នោះ​យ៉ាង​សកម្ម​ឲ្យ​ទាក់​ទាញ​វិនិយោគិន​ធនាគារ​នេះ​បាន​ជាប់​ពាក់​ព័ន្ធ​នៅ​ក្នុង​ការ​រំលោភ​យក​ដីធ្លី និង​បង្កើន​សម្ពាធ​ខ្លាំង​ឡើង ទៅ​លើ​ធនធាន​ដែល​សំខាន់​សម្រាប់​កសិករ​ដែល​ធ្វើ​កសិកម្ម​លក្ខណៈ​គ្រួសារ​និង​សហគមន៍​ជនបទ​ក្នុង​ការ​ទ្រទ្រង់​ជីវភាព»។

ដោយ​ព្យាយាម​ដាក់​កំណត់​ទៅ​លើ​ការ​បណ្តេញ​ចេញ​ពី​ដីធ្លី​និង​ដើម្បី​បង្កើន​សន្តិសុខ​ដី ធនាគារ​នេះ​បាន​ជំរុញ​ឲ្យ​មាន​កម្មវិធី​ផ្តល់​កម្មសិទ្ធិ​ដី​ធ្លី​មួយ​ចំនួន​ក្នុង ប្រទេស​កម្ពុជា រួម​ទាំង​គម្រោង​គ្រប់​គ្រង និង​រដ្ឋបាល​ដីធ្លី ដែល​សម្រួល​ទៅ​ដល់​ការ​បណ្តេញ​សហគមន៍​បឹងកក់​ចេញ​ពី​ដីធ្លី​របស់​ពួក​គេ។

លោក អេង វុទ្ធី អតីត​អ្នក​ប្រឹក្សា​យោបល់​នៅ WB បាន​ថ្លែង​ថា៖ «ធនាគារ​និយាយ​ថា គោល​បំណង​របស់​ខ្លួន​គឺ​ដើម្បី​ពង្រឹង​កម្មវិធី​ដីធ្លី​សម្រាប់​ប្រជាជន​ក្រីក្រ​និង​ងាយ​រង​គ្រោះ ប៉ុន្តែ​ផ្ទុយ​ទៅ​វិញ យើង​កំពុង​ឃើញ​ថា អ្វី​ដែល​ផ្ទុយ​ពី​នេះ​បាន​កើត​មាន​ទៅ​លើ​ប្រជាជន និង​ធ្វើ​ឲ្យ​ពួក​គេ​កាន់​តែ​លំបាក បន្ទាប់​ពី​ពួក​គេ​មិន​ត្រូវ​បាន​ដាក់​បញ្ចូល​ទៅ​ក្នុង​ការ​ផ្តល់​កម្មសិទ្ធិ​ដីធ្លី»។

បន្ទាប់​ពីការ​លើក​ឡើង​ថា ខ្លួន​នឹង​មិន​វិនិយោគ​ឡើង​វិញ​នៅ​ក្នុង ប្រទេស​កម្ពុជា លុះ​ត្រា​ណា​តែ​ជម្លោះ​បឹងកក់​ត្រូវ​បាន​ដោះ​ស្រាយ​ធនាគារ​បាន​ប្រកាស​កាល​ពី​ចុង ខែ​សីហា ថា ខ្លួន​កំពុង​ពិចារណា​ផ្តល់​កម្ចី​ថ្មី ២៥ លាន​ដុល្លារ​សម្រាប់​កម្មវិធី​ផ្តល់​កម្មសិទ្ធិ​ដីធ្លី​របស់​ខ្លួន។ សំណើ​នេះ​បាន​ធ្វើ​ឲ្យ​មាន​ការ​ខឹង​សម្បា​ពី​ក្រុម​សិទ្ធិ​មនុស្ស ហើយ​នៅ​កិច្ច​ប្រជុំ​ប្រចាំ​ឆ្នាំ​របស់​ធនាគារ​ក្នុង ទីក្រុង​វ៉ាស៊ីនតោន D.C.នា​សប្តាហ៍​នេះ ក្រុម​សិទ្ធិ​មនុស្ស​បាន​ដាក់​ញត្តិ​ប្រឆាំង​នឹង​ការ​វិនិយោគ​បន្ថែម​ទៀត​នៅ ប្រទេស​កម្ពុជា។ ញត្តិ​នោះ​បាន​លើក​ឡើង​ថា ការ​បណ្តេញ​ចេញ​ទាំង​បង្ខំ ការ​ខ្វះ​នីតិវិធី​ត្រឹម​ត្រូវ និង​សំណង​បាន​ក្លាយ​ជា​បញ្ហា​រឹត​តែ​សំខាន់​ឡើង​ក្នុង ប្រទេស​កម្ពុជា។ «វា​គ្មាន​ន័យ​ទេ សម្រាប់​ធនាគារ​នេះ​ដែល​ត្រូវ​ផ្តល់​កម្ចី​ឡើង​វិញ នា​ពេល​នេះ»។

ទាំង WB និង​ទាំង​គណៈ​កម្មាធិការ​ហិរញ្ញវត្ថុ​អន្តរជាតិ មិន​បាន​ឆ្លើយ​តប​នឹង​សំណើ​សុំ​អត្ថាធិប្បាយ​ទេ៕